सभामुखको भूमिका तटस्थ र निष्पक्ष नरहेको कांग्रेसको ठहर

काठमाडौं । प्रमुख प्रतिपक्षी दल नेपाली कांग्रेसले गृहमन्त्री रवि लामिछानेमाथि संसदीय समिति गठनको मागबाट पछि नहट्ने भएको छ । आज बसेको पार्टी संसदीय दल बैठकले संसदीय समिति गठनको मागबाट पछि नहट्ने निर्णय गरेको हो ।

बैठकले बिहीबार संसद वैठकमा सभामुखको भूमिका तटस्थ र निष्पक्ष नरहेको ठहरसमेत गरेको छ । कांग्रेस प्रमुख सचेतक रमेश लेखकले भने, ‘सम्माननीय सभामुखको पद तटस्थता र निष्पक्षताको पद हो । तर, त्यस्तो भूमिका उहाँबाट भएन । हामीले सभामुखलाई तटस्थता र निस्पक्षता कायम राख्न आग्रह गरेका छौं ।’

उनले सहकारीको रकम ठगीमा गृहमन्त्री लामिछाने संलग्न रहेको पर्याप्त प्रमाण सार्वजनिक भएकोले उनीमाथि छानबिनको माग जोडदारकासाथ उठाइने बताए । लेखकले सरकार नै सहकारी ठगीमा संलग्नहरुको संरक्षणमा लागेको बताए । उनले संसदमा प्रतिपक्षी दलका सांसदहरु उभिएको बेला सत्तापक्षकै नेताहरु उभिने कुरा स्वभाविक नभएको बताए ।