राजसंस्था, हिन्दुराष्ट्रको लक्ष्य प्राप्त गर्न राप्रपा जनताको मनमा बस्न जरुरी छ : नेता लावती

काठमाडौं । राष्ट्रिय प्रजातन्त्र पार्टी (राप्रपा) का नेता सगुन सुन्दर लावतीले राप्रपाको निरन्तरता र बृहत्तर हितका लागि विधिमा अडेर महाधिवेशनबाट विश्वसनीय नेतृत्व चयन गर्नु पर्ने बताएका छन् ।

‘राजसंस्था, हिन्दुराष्ट्रको लक्ष्य प्राप्त गर्न राप्रपा जनताको मनमा बस्न जरुरी छ । हिजोको गल्ती सच्याउनु परेको छ । त्यसैले पार्टीको बृहत्तर हित र दीर्घ जीवन मध्यनजर गर्दै, विधिमा अडेर महाधिवेशनबाट विश्वनसीय नेतृत्व चयन गर्नु पर्दछ,’ राप्रपाका कार्यसम्पादन समिति सदस्य लावतीले भने ।

आन्तरिक प्रजातन्त्र सुनिश्चित गर्न र राप्रपाप्रति जनतामा रहेको शंका, उपशंका दूर गर्न पार्टीका सबै तह र तप्काको जिम्मेवार भूमिका आवश्यक रहेको उनले बताए ।

‘नेपाल युवा देश हो । त्यसकारण बहुसंख्यक युवा जनमत आकर्षण गर्न राप्रपाले विशेष ध्यान दिनु पर्दछ,’ नेता लावतीले भने । ‘युवा र महिलालाई समेट्न पार्टीले कुनै कसर बाँकि राख्न हुँदैन ।’ एक टेलिभिजन कार्यक्रममा बोल्दै राप्रपाका युवा नेता लावतीले सो विचार व्यक्त गरेका हुन् ।

महाधिवेशनको सन्दर्भमा नेतृत्व हस्तान्तरणको बहस राप्रपा भित्र जारी रहेको स्वीकार गर्दै लावतीले युवा उर्जाको यथेष्ट उपयोग र सम्मान हुनु पर्ने जिकिर गरे । दोस्रो पुस्ताको बहसबाट पार्टी पछि फर्कने नसक्ने उनको भनाइ थियो । अर्को एक प्रसंगमा नेपालको सार्वभौमिकता, राष्ट्रियता र प्रजातन्त्र सुढृद गर्न राजसंस्थाको अपरिहार्यतालाई स्वीकार गर्नु पर्ने बताए ।

‘सकारात्मक शान्ति, धर्म, सँस्कृति, परम्परा र राष्ट्रिय एकतालाई अक्षुण्ण राख्न राजसंस्थाको आवश्यकता देशव्यापी महसुस भएको छ । नेपालको सार्वभौमिकता, राष्ट्रियता र प्रजातन्त्रसमेत सुढृद गर्न राजसंस्थाको अपरिहार्यता स्वीकार गर्नु पर्ने अवस्था छ,’ लावतीले भने ।

‘देशमा राजसंस्था चाहिएको छ, हिजो भएको गल्ती सच्याउनु परेको छ । विकसित घटनाक्रमले यही अवस्था चित्रण गरेको छ,’ उनले भने । ‘सुर्यलाई हत्केलाले कति दिन छेक्ने ?’

शान्ति प्रक्रियाको आरम्भबाटै संरचनागत त्रुटी भएको उनको भनाइ थियो ।

‘राजसंस्था अर्थात् दरबार, संसदवादी शक्ति र माओवादीबीच त्रिपक्षीय द्वन्द्व थियो । तर शान्ति प्रक्रियामा द्वन्द्वको एक पक्ष, राजसंस्थालाई समावेश गरिएन । सोही संरचनागत त्रुटीको प्रतिफल नेपालमा सकारात्मक शान्ति प्राप्त भएन,’ लावतीले भने ।

सकारात्मक शान्ति, नयाँ नेपाल, समावेशिता, समृद्धि र पहिचान केही पनि बाचा गरे अनुसार पूरा नभएको उनको भनाइ थियो ।