अमेरिकाबाट अनुदानप्राप्त खोप लगाउन सुरु, प्रधानमन्त्री देउवाद्वारा खोप केन्द्रको अनुगमन

काठमाडौं । अमेरिकाबाट अनुदान प्राप्त कोरोनाविरुद्धको जोन्सन एण्ड जोन्सनको खोप लगाउने कार्यको शुभारम्भ गरिएको छ । सोमबार प्रधानमन्त्री शेरबहादुर देउवाले जोरपाटीस्थित खगेन्द्र नवजीवन केन्द्रमा स्वास्थ्यकर्मीलाई खोप हस्तान्तरण गरेर खोप अभियानको शुभारम्भ गरेका हुन् ।

अमेरिकाले जोन्सन एण्ड जोन्सन कम्पनीको १५ लाख ३४ हजार ८५० डोज खोप नेपाललाई उपहार स्वरुप दिएको थियो । यो खोप एक डोजमात्र लगाए पुग्छ ।

यो खोप आजबाट ५० देखि ५४ वर्ष उमेर समूहका, अपांगताको क र ख वर्गको परिचयपत्र पाएका, नेपालमा बसोबास गरिरहेका शरणार्थी, सफाइकर्मी लगायतलाई दिन सुरु गरिएको स्वास्थ्य मन्त्रालयले जनाएको छ । साउन ४ गतेदेखि ६ गतेसम्म जोन्सन एण्ड जोन्सनको कोरोना खोप लगाउने निर्णय यसअघि नै सरकारले गरिसकेको छ ।