एकता गर्दा नाम तल राख्न मानेर बाबुरामको उचाई अझै बढेको छः कमल थापा
काठमाडौँ । राष्ट्रिय प्रजातन्त्र पार्टीका अध्यक्ष कमल थापाले निर्वाचन आयोगमा पेश गरेको कागजले डा. बाबुराम भट्टराईको राजनीतिक उचाई वा वरियता कायम नहुने टिप्पणी गरेका छन् । जनता समाजवादी पार्टी आइतबार निर्वाचन आयोगमा दर्ता हुदा डा. भट्टराईलाई चौथो वरियतामा राखिएपछि सामाजिक संजालमा भएको टिप्पणीप्रति ट्वीट गर्दै अध्यक्ष थापाले यसले भट्टराईको उचाई बढेको बताएका हुन् ।
थापाले डा. भट्टराईसँग धेरै विषयमा आफ्नो मतभेद भएको बताउदै लामो राजनीतिक यात्रा र संघर्षले समाजमा उनको स्थान तय भइसकेको टिप्पणी गरेका छन् ।
उनले लेखेका छन्, ‘वरियताको विषयमा बाबुराम भट्टराईलाई केहीले खिसी गरेको पढें । बाबुरामजीसंग धेरै विषयमा मेरो मतभेद छ । तर, उहाँको वरियता र राजनीतिक उचाई निर्वाचन आयोगमा पेश भएको कागजले गर्दैन । लामो राजनीतिक यात्रा र संघर्षले समाजमा उहाँको स्थान कायम भैसकेको छ । एकतागर्दा नाम तल राख्न मानेर बरु उहाँको उचाई अझै बढेको देखिन्छ ।’
