अध्यक्ष ओलीले पार्टी एकता भाँड्ने गतिविधि गरेको माधव नेपाल पक्षको निष्कर्ष
काठमाडौं । नेकपा एमालेको माधव नेपाल पक्षले पार्टी एकता विरोधी कुनै पनि खालका गतिविधि नगर्न अध्यक्ष केपी शर्मा ओलीको ध्यानाकर्षण गराएको छ ।
नेता नेपाल पक्षको बुधबार बसेको स्थायी समितिको बैठकले पार्टी एकताका लागि वार्ता चलिरहेका बेला आफू पक्षीय सांसदहरुलाई स्पष्टीकरण सोध्ने तथा वरिष्ठ नेता माधवकुमार नेपालविरुद्ध उत्तेजक नाराबाजी लगाउने लगायतका गतिविधिप्रति आपत्ति जनाउँदै त्यस्ता खालका एकताविरोधी गतिविधि नगर्न अध्यक्ष ओलीको ध्यानाकर्षण गराएको हो ।
बैठकपछि नेता रघुजी पन्तले एकता वार्ता चलिरहेको र १० बुँदे सहमति बुझाएको अवस्थामा स्पष्टीकरण सोध्ने र वरिष्ठ नेता नेपालविरुद्ध नारा जुलुस गर्ने एवम् पुत्ला जलाउने साथै संविधान र सर्वोच्च अदालतको फैैसला अनुरुप आफ्नो विवेक प्रयोग गरेर विश्वासको मत दिने सांसदहरुलाई आतंकित पार्ने काम गरेको भन्दै आपत्ति जनाए । उनले यस्ता गतिविधि रोक्ने पनि आग्रह गरेका छन् ।
नेपाल पक्षले अदालतको फैसला अनुसार आफ्ना पार्टीका २२ जना सांसदले स्वविवेक प्रयोग गरी प्रधानमन्त्री शेरबहादुर देउवालाई विश्वासको मत दिने अधिकार रहेको निष्कर्ष निकाल्दै यसै विषयलाई लिएर उनीहरुलाई स्पष्टीकरण सोध्ने काम गरेर पार्टीको एकतालाई भाँडने काम गर्न कुनै हालतमा नमिल्ने बताएको छ ।
बैठकले पार्टी भित्र एकताको वातावरण बनिरहेको उल्लेख गर्दै त्यसलाई विथोल्ने काम नगर्न पनि अध्यक्ष ओली पक्षीय नेताहरुलाई आग्रह गरेको छ ।
पार्टी एकता कार्य दलका समेत रहेका नेता गोकर्ण विष्टले यस्ता गतिविधिले पार्टी एकताको वातावरणलाई विगार्ने बताए । उनले भने, ‘यसले पार्टी एकताको वातावरणलाई धमिल्याउने काम गर्छ । एकताको जुन वातावरण बनिरहेको छ, त्यो वातावरणलाई कमजोर बनाउने, यसलाई बिथोल्ने र धमिल्याउने काम कतैबाट पनि हुुनु स्वभाविक हुन सक्दैन । पार्टीलाई एकतावद्ध गर्ने सन्दर्भमा यसले सहयोग पुर्याउँदैन ।’
वरिष्ठ नेता नेपालसहितका २२ जना सांसदले प्रधानमन्त्री देउवालाई विश्वासको मत दिएको भन्दै एमालेको ओली पक्षले साउन चार र पाँच गतेको मिति राखेर २४ घण्टे स्पष्टीकरण सोधेको छ ।
