माधव नेपालको हकमा गल्ती कमजोरी स्वीकार गर्ने, आत्मालोचना गर्ने कुनै ठाउँ छैनः ओली
काठमाडौं । निवर्तमान प्रधानमन्त्री एवम् एमाले अध्यक्ष केपी शर्मा ओलीले अब एमालेमा वरिष्ठ नेता माधवकुमार नेपाललाई ठाउँ नभएको बताएका छन् ।
बुधबार प्रधानमन्त्री निवास बालुवाटारबाट निजी निवास बालकोट पुगेपछि समर्थकलाई सम्बोधन गर्दै अध्यक्ष ओलीले आत्मआलोचना गरेर आए अन्य नेतालाई ठाउँ भएपनि माधव नेपालका लागि एमालेमा ठाउँ नभएको बताएका हुन् ।
उनले भने, ‘अरुले आत्मआलोचना गरे भने ठाउँ दिन सकिन्छ । तर माधव नेपालको हकमा गल्ती कमजोरी स्वीकार गर्ने आत्मालोचना गर्ने कुनै ठाउँ छैन।’
ओलीलाई बालुवाटारबाट बुधबार दिउँसो एमालेको भातृ संगठन युथ फोर्स र युवा संघका कार्यकर्ताले बाजागाजासहित बालकोट लगेका हुन्। ओली समर्थकले पुष्पकमल दाहाल प्रचण्ड र वरिष्ठ नेता नेपालविरूद्ध नाराबाजी गरेका थिए ।
