सेती प्रादेशिक अस्पतालमा उपचाररत ३४ वर्षीय पुरुषमा भेटियो कोरोना भाइरसको संक्रमण

काठमाडौं । नेपालमा कोरोना भाइरसका चौथो संक्रमित व्यक्ति भेटिएका छन् । स्वास्थ्य मन्त्रालयले शुक्रबार साँझ भिडियो कन्फ्रेन्समार्फत सेती प्रादेशिक अस्पताल धनगढीमा उपचाररत एक जनामा कोरोनाको संक्रमण भेटिएको जानकारी गराएको हो ।

३४ वर्षीय पुरुषमा कोरोना संक्रमण पोजेटिभ देखिएको मन्त्रालयले जनाएको छ । उनको अवस्था सामान्य रहेको बताइएको छ । मन्त्रालयले कोरोनाको संक्रमण काठमाडौं बाहिर पनि देखिएकाले सबैलाई लकडाउनको पालना गरी घरभित्रै बस्न आग्रह गरेको छ । यसअघि कोरोनाको संक्रमण देखिएका एक जना निको भइ घर फर्किसकेका छन् भने दुई जना उपचाररत छन् ।