धनी र ठूलाबडाहरुलाई मात्र हो त यो देश कि सबैलाई हो ?
क्याप्टेन विजय लामा ।
१७ जुलाईमा १२ वटा शव
२१ जुलाईमा एउटा शव
२४ जुलाईमा २४ वटा शव र तीन वटा अस्तु ।
एक हप्ता भित्र मलेसियाबाट ३७ वटा शव, तीनवटा अस्तु र अझै अर्को १८ वटा ल्याउनुनै छ बाँकी!!!
मनमा धेरै दुःख लाग्दा लाग्दै पनि बाध्य छौं ल्याउनलाई । देशको स्थिति नै यस्तै छ ! धनी र ठूला बडाहरुलाई मात्र हो त यो देश कि सबैलाई हो ?
मलेशियाको क्वालालम्पुरबाट वैदेशिक रोजगारीमा गएर फर्कन लागेका यात्रुसँगै, आज मेरो उडान फ्लाइट नम्बर आर ए ४१६ मा, रोजगारीको क्रममा कोभिड १९ बाहेकको अरु विभिन्न कारणले ज्यान गुमाएका नेपाली दाजुभाइको २४ वटा शव तथा ३ वटा अस्तु पनि ल्याएका थियौं हामीले । अझै अर्को उडानमा पनि १८ वटा शव ल्याउनु बाँकी छ रे !!!
विदेशमा श्रम र पसिना बेच्न गएका नेपाली दाजुभाइ दिदिबहिनीको शव ल्याउँदा जस्तो दुःख पीडा अरु कुनै पनि उडान गर्दा हुन्न ।
तथ्यांकमा मात्र सीमित हुने त होला देशको सरकारको निमित्त तर मृत व्यक्ति तथा उनका आश्रित परिवारको भने सर्वस्व गुमेको छ !
अब पनि पुगेन देशलाई बरबाद पार्दै नेपाली जनतालाई विदेश जान बाध्य बनाउने गरि एक आपसमा झगडा गर्न ??? यति देखे पछि त केही गर्नु नि देश र जनताको लागि !!! आफ्नो अनि पार्टीको स्वार्थ भन्दा माथि उठ्न सकिन्न र ??
हार्दिक श्रद्धाञ्जली।
