प्रतिनिधिसभाको बैठक पुस १६ गतेसम्मका लागि स्थगित
काठमाडौं । सभामुखको टुंगो नलागेपछि शुक्रबारका लागि बोलाइएको प्रतिनिधिसभाको बैठक स्थगित गरिएको छ । बैठकमा सभामुख निर्वाचनको कार्यतालिका तय गर्ने सम्भावित कार्यसूची भएपनि नेकपाले उम्मेदवारकै टुंगो नलगाएपछि निर्वाचन कार्यतालिकाका लागि बोलाइएको बैठक सूचना टाँसेर पुस १६ गते दिउँसो १ बजेसम्मका लागि स्थगित गरिएको हो ।
शुक्रबारै उपसभामुख शिवमाया तुम्बाहाम्फेले राजीनामा दिने र प्रतिनिधिसभा बैठकको अध्यक्षता प्रतिनिधिसभाका ज्येष्ठ सदस्यले गर्ने तयारी भनिए पनि बैठक उपसभामुख तुम्बाहाम्फेको राजीनामा पनि आएको छैन ।
तत्कालीन सभामुख कृष्णबहादुर महराले बलात्कारको आरोप लागेर राजीनामा दिएपछि प्रतिनिधिसभा सभामुखविहीन छ ।
प्रचण्डमाथि पूर्वमाओवादीबाट सभामुख पद छोड्न नहुने दबाब छ भने पूर्वएमालेहरु पार्टी एकीकरणपछि पनि भागवण्डा खोज्न नहुने भन्दै संसदीय प्रक्रियाका अनुभवी सुवास नेम्वङलाई सभामुख बनाउनुपर्ने अडानमा छन् ।
