पहिलेसिनेटमा नियन्त्रण गर्ने संघारमा रिपब्लिकन
बीबीसी । ओहायो राज्यका वर्तमान सिनेटर शेरड ब्राउन पराजित भएपछि अब सिनेटमा डेमोक्र्याटिक पार्टीले आफ्नो नियन्त्रण बनाइराख्ने सम्भावना झिनो बन्दै गएको छ । उक्त पार्टीले दुई सीट गुमाइसकेको छ भने मन्टानामा पनि जोन टेस्टर जोखिममा परेका छन्।
अन्यत्र डेमोक्र्याटहरूले नजिते अब सिनेटको नियन्त्रण रिपब्लिकनको हातमा पुग्ने छ । यतिखेर डेमोक्र्याट उम्मेदवारले सिनेट सदस्य जित्ने अन्य ठाउँ खासै देखिँदैन । फ्लोरिडा र टेक्ससमा रिपब्लिकन उम्मेदवारले जितिसके। नेब्रास्कामा ६९ प्रतिशत मतगणना भइसक्दा रिपब्लिकन उम्मेदवार डेब फिशर स्वतन्त्र उम्मेदवार ड्यान अस्बोर्नभन्दा थोरैले अगाडि छन् ।
अस्बोर्नले जिते पनि सिनेटमा उनी डेमोक्र्याटहरूको पक्षमा लाग्छन् भन्न सकिँदैन । यदि डोनल्ड ट्रम्प राष्ट्रपति अनि जेडी भान्स उपराष्ट्रपतिमा निर्वाचित भए भने जेडी भान्सले सिनेटमा ‘टाइ–ब्रेकिङ’ अर्थात् निर्णायक भोट हाल्न पाउने हुनाले नेब्रास्कामा जेसुकै भएपनि त्यसले महत्त्व राख्ने छैन । यो रात रिपब्लिकनहरूका लागि हर्षको रात हुने जस्तो देखिँदै छ ।
ताजा विवरणहरूका अनुसार डोनल्ड ट्रम्पले महत्त्वपूर्ण स्विङ स्टेट नोर्थ क्यारोलाइनामा जित हासिल गर्दै १६ इलेक्टोरल कलेज मत पाएका छन् । ट्रम्प अभियानको निम्ति यो सुखद समाचार हो किनभने यसले उनलाई आवश्यक न्यूनतम २७० इलेक्टोरल कलेज भोट पाउने मार्ग थप प्रशस्त गर्छ ।
तर कडा प्रतिस्पर्धा हुने ठानिएका राज्यमध्ये अधिकांशमा नतिजा यस्तै हुन्छ भन्न सकिने स्थिति छैन। ती सात राज्यको परिणामले उम्मेदवारलाई ह्वाइट हाउस पुग्ने बाटो खोलिदिन्छ ।
‘रस्ट बेल्ट स्टेट’ भनिने विस्कन्सिन, पेन्सिल्भेनिआ र मिशिगन तीनवटै राज्यमा जितिन् भने कमला ह्यारिसले अझै पनि बाजी मार्न सक्छिन् । रिपब्लिकनहरूका निम्ति नोर्थ क्यारलाइनाको जित ठूलो हो तर उक्त राज्यमा विगतका चुनावी नतिजाहरूसँग भने यो प्रवृत्ति मेल खान्छ। सन् २०१६ र सन् २०२० मा पनि यहाँ ट्रम्पले जितेका थिए। यो राज्य जित्ने पछिल्लो डेमोक्र्याटिक उम्मेदवार भनेको सन् २००८ मा बराक ओबामा हुन्।
