भूकम्पबाट टर्की र सिरियामा एकसय भन्दाबढीको मृत्यु
टर्की र सिरियामा शक्तिशाली भूकम्पमा परी एकसय भन्दाबढीको मृत्यु भएको छ । भूकम्पका कारण धेरै घरहरू भत्किएका छन् ।
टर्कीको मलाट्यामा मात्रै कम्तिमा २३ जनाले ज्यान गुमाएको पुष्टि भएको छ। टर्कीको विपद व्यवस्थापन सम्बन्धी निकायले ७६ जनाको निधन भएको र ४४० भन्दा बढी घाइते भएका जनाएको छ ।
सीमापारी सिरियामा कम्तिमा ४२ जनाको मृत्यु भएको त्यहाँको सरकारी सञ्चारमाध्यमले जनाएको छ । टर्कीका राष्ट्रपति रेजेप टाइयीप एर्दोआनले सामाजिक सञ्जालमार्फत् सन्देश दिँदै सकेसम्म चाँडो र कम क्षतिसहित यो विपद्बाट पार पाउने उल्लेख गरेका छन् ।
उनले प्रभावित क्षेत्रहरूमा खोज तथा उद्धार टोली तत्कालै पठाइएको भन्दै अरू एकाइहरूलाई पनि सतर्क अवस्थामा राखिएको बताएका छन् ।
भूकम्प गएको स्थान दक्षिण–पूर्वी टर्कीस्थित गाजीयान्टेप सिरियासँगको सीमानजिकै पर्छ । यूएस जियोलोजिकल सर्भेका अनुसार टर्कीको स्थानीय समयअनुसार बिहान ४ बजेर १७ मिनेटमा ७.८ म्याग्निट्यूडको भूकम्प गएको हो ।
भूकम्पको धक्का राजधानी अङ्कारासहित टर्कीका विभिन्न सहरहरूमा महसुस गरिएको थियो । कैयौँ भवनहरू भत्किएका र त्यहाँ केही मानिस फसेका हुनसक्ने विवरणहरू सार्वजनिक भइरहेका छन् ।
टर्की विश्वको सबैभन्दा सक्रिय भूकम्पीय क्षेत्रहरू मध्ये एक हो । सन् १९९९ मा देशको उत्तर–पश्चिममा शक्तिशाली भूकम्प गएपछि १७ हजार भन्दाबढी मानिसले ज्यान गुमाएका थिए ।