पाँच हजार भन्दा बढी बन्दी रिहा गर्ने म्यान्मार सरकारको घोषणा
म्यान्मारमा देशको शासनसत्ता सेनाले लिने कदमको विरोध गर्दा पक्राउ परेका साढे पाँच हजारभन्दा बढी बन्दीलाई मुक्त गर्ने घोषणा सैन्य सरकारले गरेको छ ।
गत फेब्रुअरीमा निर्वाचित सरकारलाई अपदस्थ गर्दै सेनाले सत्ता हातमा लिएपछि रक्तपातपूर्ण विरोधप्रदर्शनहरू भएका थिए। त्यस क्रममा हजारौँ मानिसहरू पक्राउ परेका थिए भने सयौँ जनाको मृत्यु भएको थियो । म्यान्मारका सैन्य नेता जेनरल मिन ओङ ह्लाइङले मानवीय कारणले ५,६३६ बन्दीलाई रिहा गरिने बताएका छन् ।
सेना प्रमुखलाई राजनीतिक सङ्कट अन्त्य गर्नका लागि पर्याप्त कदम नचालेको भन्दै एउटा वार्षिक क्षेत्रीय सम्मेलनमा आमन्त्रण नगर्ने निर्णय गरिएको केही दिनमा नै यस्तो घोषणा भएको हो । दक्षिण पूर्वी एशियाली देशहरूको सङ्गठन (आसियान)ले जेनरल मिन ओङ ह्लाइङको सट्टा म्यान्मारबाट एकजना गैरराजनीतिक व्यक्तिलाई निम्तो गर्ने निर्णय गरेको थियो।
एउटा निगरानी समूहका अनुसार म्यान्मारमा आङ सान सूकीलाई सत्ताबाट हटाइएपछि गरिएको दमनका क्रममा कम्तीमा १,१७८ जनाको मृत्यु भएको छ भने ७,३५५ जनलाई पक्राउ गर्नेदेखि अभियोग लगाउने र सजाय दिने काम भएको छ ।
सेना प्रमुख मिन ओङ ह्लाइङले अक्टोबर महिनाको अन्त्यतिर पर्ने एउटा महत्वपूर्ण बौद्ध पर्वलाई ध्यान दिएर उनीहरूलाई रिहा गरिन लागेको बताए । टेलिभिजनमा बोल्दै सेना प्रमुखले सैन्य नेताहरू शान्ति र लोकतन्त्रका निम्ति प्रतिबद्ध भएको बताए ।
उनले उनको सरकारले प्रजातन्त्र पुनःीथापना गर्न पाँच चरणको योजना बनाएको बताए । अधिकारीहरूले सैनिक कूको विपक्षमा प्रदर्शन गरेका दुई हजार आन्दोलनकारीलाई गत जुलाईमा रिहा गरेका थिए । आसियानले शुक्रवार बसेको उक्त सङ्गठन आबद्ध देशका विदेशमन्त्रीको आपत्कालीन बैठकमा म्यान्मारको सेनालाई अक्टोबर २६ देखि २८ सम्म हुने शिखर बैठकमा प्रतिनिधित्व गर्न दिने या नदिनेमा सहमति नभएको जनाएको थियो ।
सदस्य देशका आन्तरिक मामिलामा हस्तक्षेप नगर्ने परम्परा रहेको १० सदस्यीय क्षेत्रीय समूहले गरेको उक्त निर्णयलाई अभूतपूर्व भनिएको थियो । उक्त समूहले म्यान्मारका सैन्य नेताहरूले संवाद र द्वन्द्व कम गर्ने आफ्ना वाचा पूरा गर्न नसकेको र आफ्ना प्रतिनिधिहरूलाई अहिले नजरबन्दमा राखिएकी आङ सान सू चीलाई भेट्न नदिइएको उल्लेख गरेको थियो ।
