भारतमा थप २ लाख ६७ हजारलाई कोरोना संक्रमण, ४५ सय भन्दाबढीको मृत्यु,
भारतमा पछिल्लो केही दिनदेखि कोरोना संक्रमणदर घटेपनि मृत्यु हुनेको संख्यामा भने कमी आएको छैन । भारतको स्वास्थ्य तथा परिवार कल्याण मन्त्रालयका अनुसार पछिल्लो चौबीस घण्टामा कोरोना संक्रमणबाट थप ४ हजार ५ सय २९ जनाको मृत्यु भएको छ ।
भारतमा कोरोना संक्रमणबाट एकैदिन मृत्यु हुनेको यो संख्या अहिलेसम्मकै धेरै हो । यसअघि भारतमा सोमबार कोरोनाबाट ४ हजार ३ सय २९ को मृत्यु भएको थियो ।त्यस्तै पछिल्लो २४ घण्टामा भारतमा २ लाख ६७ हजार ३ सय ३४ जनामा संक्रमण पुष्टि भएको छ ।
भारतमा सोमबार २ लाख ६३ हजार ५ सय ३३ जनामा संक्रमण पुष्टि भएको थियो । भारतमा २५ दिनपछि पहिलो पटक आइतबार एक दिनमा ३ लाखभन्दा कममा कोरोना संक्रमण पुष्टि भएको हो ।
त्यस्तै पछिल्ला दिनमा दैनिक संक्रमणमुक्त हुनेको संख्या पनि बढेको छ । भारतमा पछिल्लो २४ घण्टामा ३ लाख ८९ हजार ८ सय ५१ जना संक्रमणमुक्त भएका छन् ।
भारतमा अहिलेसम्म २ करोड ५४ लाख ९६ हजारभन्दा बढीलाई संक्रमण पुष्टि भएको छ भने करिब २ करोड २० लाख संक्रमणमुक्त भएका छन् । त्यस्तै कोरोनाबाट मृत्यु हुनेको संख्या २ लाख ८३ हजार २ सय ४८ पुगेको छ ।
