भ्रष्टाचार मुद्दामा ब्राजिलका पूर्वराष्ट्रपति लुलालाई सफाइ
ब्राजिलका पूर्वराष्ट्रपति लुइज इनासियो लुला डा सिल्भालाई सर्वोच्च अदालतका एक न्यायाधीशले भ्रष्टाचारको दोषबाट सफाइ दिएका छन् । यसले सन् २०२२ को राष्ट्रपति निर्वाचनमा सहभागी हुने उनको बाटो खुलेको छ ।
वामपन्थी नेता लुलालाई सन् २०१९ मा १८ महिना कैदपछि रिहा गरिएको थियो । ब्राजिलको सर्वोच्च अदालतका एक न्यायाधीशले लुलाविरुद्धका यसअघिका प्रमाणित आपराधिक दोष रद्द गरिदिएका छन् ।
उनलाई अपरेशन कार वाश नामक घुसकाण्डको अनुसन्धानपश्चात् दोषी ठहर गरिएको थियो। त्यसमा अन्य नेता तथा व्यापारीहरू पनि परेका थिए । तर न्यायाधीश एड्सन फाकिनले ती दोषबाट उनलाई सफाइ दिएका छन् ।
उनलाई दोषी ठहर गरेको दक्षिणी सहर कुरिचीबाको अदालतलाई ती चारवटा मुद्दा हेर्ने अधिकार नभएको भन्दै न्यायाधीश फाकिनले अब तिनको सुनुवाइ राजधानी ब्रजिलियास्थित सङ्घीय अदालतमा हुने फैसला गरेका छन् ।
अब उनीमाथि लागेका दोष पुनः प्रमाणित नभएसम्म उनको राजनीतिक अधिकार पुनःस्थापित हुनेछ । अर्थात् आगामी चुनावमा उनी वर्तमान राष्ट्रपति जइर बोल्सोनारुविरुद्ध लड्न सक्नेछन् । सन् २००३ देखि २०१० सम्म राष्ट्रपति रहेका लुलालाई सन् २०१८ मा दोषी ठहर गरिएको थियो ।
दोषी ठहर भएपछि डेढ वर्ष जेल परेका उनलाई आजीवन सार्वजनिक पदमा चुनाव लड्न प्रतिबन्ध लगाइएको थियो । तर पछिल्लो फैसलाले अहिलेको निम्ति उनलाई चुनावको बाटो खुलेको छ ।
एक विज्ञप्ति जारी गर्दै लुलाले उनी सधैँ सही थिए भन्नेको यो स्वीकारोक्ति मात्र भएको बताए । ब्रजिलका वर्तमान राष्ट्रपति बोल्सोनारुले देशका जनताले लुलालाई फेरि उम्मेदवारका रूपमा हेर्न नचाहेको बताएका छन् ।
