नाइजेरियामा बोको हरामले अपहरण गरेका ३४४ विद्यार्थी मुक्त
नाइजेरियाको उत्तरी राज्य कितसिनाबाट करिब एक साताअघि बन्दुकधारीहरुले विद्यालयमा आक्रमण गरी बेपत्ता पारिएका ३४४ विद्यार्थी मुक्त भएका छन् । राज्यका गभर्नर अमिनु मासारीले अपहरित विद्यार्थी मुक्त भएका जानकारी दिएका हुन् ।
अपहरणमा आतङ्ककारी समूह बोको हरामको हात रहेको छ । अपहरण मुक्त भएका प्रायःविद्यार्थीहरु केटा भएका मसारीले नाइजेरियाली टेलिभिजन एनटिएनलाई बताएका छन् । हाल ती विद्यार्थीहरु कितसिना राज्यतर्फ फर्किर्दै गरेका र उनीहरुलाई स्वास्थ्य उपचार गराई परिवारजनको जिम्मा लगाइने मसारीले बताएका छन् ।
कितसिना राज्यको कंकरा इलाकामा रहेको सरकारी विज्ञान माध्यमिक विद्यालयका विद्यार्थीहरुलाई डिसेम्बर ११ का दिन विद्यालयमा आक्रमण गरी बन्दुकधारी समूहले अपहरण गरेका थिए ।
स्थानीय सञ्चार माध्यमकाअनुसार ती विद्यार्थीहरुलाई छिमेकी राज्यको एक विशाल जंगलमा लगिएको थियो । बोको हरामले बुधबार ती बालबालिका आफूले अपहरण गरी लगेको र अहिले पनि उनीहरु आफूसँगै रहेका बताएको थियो ।
नाइजेरियाको बोको हराम समूहले विद्यालयबाट विद्यार्थीलाई अपहरण गरेर लैजाने र आफ्नो सैन्य समूहमा भर्ती गर्ने गर्दछन् ।
