ब्रिटेनका राजकुमार विलियमलाई कोरोना सङ्क्रमण
ब्रिटेनका राजकुमार विलियमलाई गत अप्रिल महिनामै कोरोनाभाइरस सङ्क्रमण पुष्टि भएको ब्रिटिश राजदरबारका स्रोतहरूले बीबीसीलाई बताएका छन् । उनलाई अप्रिलमा बुवा प्रिन्स अफ वेल्स चाल्र्सलाई सङ्क्रमण भएताका नै सङ्क्रमण देखिएको बताइएको छ ।
यो विषयबारे पहिलो पटक समाचार छापेको सन पत्रिकाका अनुसार ३८ वर्षीय विलियमले नागरिकहरूलाई अनावश्यक तनाव नहोस् भनेर आफ्नो सङ्क्रमणकाबारे सार्वजनिक जानकारी नदिएका हुन् ।
राजकुमार विलियमको निवास तथा कार्यालय रहेको केन्सिङ्टन दरबारले यो विषयमा आधिकारिक जानकारी दिन अस्वीकार गरेको छ । विलियलले ’अन्य महत्वपूर्ण कुराहरू भइरहेको र कसैलाई पनि तनाव दिन मन नलागेकोले’ सङ्क्रमणका बारेमा नबताएको सनले लेखेको छ । उनले दरबारकै चिकित्सकहरूसँग उपचार गराएको र सरकारी निर्देशिकाअनुसार एकान्तवासका नियमहरू पालना गरेको पत्रिकाले बताएको छ ।
राजकुमार विलियमले अप्रिलमा फोन र भिडिओ कलमार्फत् १४ वटा कार्यक्रममा भाग लिएको बताइएको छ । राजकुमार चाल्र्सलाई मार्चमा कोरोनाभाइरस सङ्क्रमण भएपछि उनले स्कटल्यान्डमा सात दिन एकान्तवासमा बिताएका थिए ।
निको भएपछि ७१ वर्षीय चाल्र्सले आफू सहजै उम्किएको बताएका थिए । अप्रिलमा प्रधानमन्त्री बोरिस जोनसनलाई पनि कोरोनाभाइरस सङ्क्रमण भएको थियो। उनलाई सघन उपचार कक्षमा राखिएको थियो ।
ब्रिटेनमा अहिलेसम्म १० लाख ३४ हजारभन्दा बढी मानिसमा कोरोनाभाइरस सङ्क्रमण पुष्टि भएको छ । तीमध्ये ४६ हजार ७०० जनाको मृत्यु भएको सरकारी तथ्याङ्क छ ।
