पाकिस्तानमा बम विस्फोट हुँदा कम्तीमा सात जनाको मृत्यु, १ सय १० भन्दाबढी घाइते
पाकिस्तान । पाकिस्तानमा शक्तिशाली बम विस्फोट हुँदा कम्तीमा सात जनाको मृत्यु भएको छ ।
मङ्गलबार बिहान भएको घटनामा परी अन्य १ सय १० जना भन्दाबढी घाइते भएको सरकारी अधिकारीहरुले जानकारीअनुसार दिएका छन् । स्थानीय जमिया जुबैरिया मदरसामा इस्लाम धर्मका बारेमा विशेष कक्षा सञ्चालन भइरहेका बेलामा विस्फोटन भएको हो ।
विस्फोटनमा परी मृत्यु भएका र घाइते भएका सबै विद्यार्थी रहेको जनाइएको छ । घटनास्थलमा शङ्कास्पद झोला भेटिएको र घटनाका बारेमा पूर्ण अनुसन्धान शुरु गरि सकिएको प्रहरी अधिकृत वाक्वार अजिमले जानकारी दिए । विस्फोटनका लागि पाँच किलो विस्फोटक पदार्थ प्रयोग गरेको पाइएको प्रारम्भिक अनुसन्धानबाट देखिएको प्रहरी अधिकारीहरुले जानकारी दिएका छन् । घाइते भएकामध्ये केहीको अवस्था गम्भीर रहेको जनाइएको छ । घटनामा परी केही शिक्षक र कर्मचारीसमेत घाइते भएका छन् ।
घाइते भएका विद्यार्थी अधिकांश २५ वर्षको हाराहारीका रहेका छन् । घाइते भएकामध्ये केही विद्यार्थी अफगानीसमेत रहेको जनाइएको छ । पाकिस्तानी प्रधानमन्त्री इमरान खानले घटनाप्रति गहिरो दुःख व्यक्त गर्दै शोक सन्तप्त परिवारजनप्रति समवेदना व्यक्त गरेका छन् भने घाइतेहरुको शीघ्र स्वास्थ्य लाभको कामना गरेका छन् ।
