अफगानिस्तानमा तालिबान लडाकूसँग भएको भिडन्तमा सात सैनिकको मृत्यु
अफगानिस्तानको उत्तरी प्रान्त कुन्दुजको सहिब जिल्लामा अफगानिस्तानको सुरक्षा अधिकारी र तालिबान लडाकूहरुबीच भएको भिडन्तमा परी सात जना सैनिक मारिएका छन् ।
भिडन्तमा परी अरु कम्तीमा पनि पाँच जना तालिबान लडाकूको मृत्यु भएको एक स्थानीय अधिकारीले पुष्टि गरेका छन् । कुन्दुज प्रान्तको इमाम साहिब जिल्लामा भएको झडपमा परी ती सैनिक मारिएका अधिकारीहरुले जानकारी दिएका छन् ।
उनीहरुका अनुसार उक्त क्षेत्रमा रहेको सुरक्षा जाँच चौकीमा ठूलो संख्यामा आएका लडाकूहरुले हातहतियारले आक्रमण गरेपछि दोहोरो भिडन्त भएको थियो । भिडन्तका क्रममा ती सैनिक मारिएका बताइएको हो ।
त्यसैगरी सो झडपका क्रममा अरु पनि केही सैनिक घाइते भएका पनि बताइएको छ । उक्त जिल्लामा केही दिनयतादेखि तालिबान लडाकूहरुले निरन्तर आक्रमण गर्दै आएका छन् । उता कतारको दोहामा अफगान सरकार र तालिबानीबीच शान्ति वार्ता जारी रहेको छ । तर पनि यता भने तालिबानीहरुले आक्रमण गर्न छोडेका छैनन् ।
