सूर्य नेपाल प्रिमियर गल्फ च्याम्पियनसिप मंगलबारदेखि
काठमाडौं । सूर्य नेपाल टुर २०२२–२३ अन्तर्गतको अन्तिम प्रतियोगिताको रुपमा सूर्य नेपाल प्रिमियर गल्फ च्याम्पियनसिप मंगलबारबाट सुरु हुँदै छ । यो शीर्ष वरीयताका लागि प्रतिस्पर्धा हुन लागेको हो ।
गोकर्ण गल्फ क्लबमा हुने प्रिमियर गल्फ च्याम्पियनसिप चार दिन सम्म चल्ने छ । ७२ होलमा हुने च्याम्पियनसिपको सुरुवाती दुई दिनपछि शीर्ष २१ व्यावसायिक खेलाडीले मात्र अन्तिम ३६ होलको प्रतिस्पर्धा गर्न पाउनेछन् ।
जसमा एमेच्योरतर्फका शीर्ष ६ खेलाडी पनि रहनेछन् । नेपाल नम्बर वान शुक्रबहादुर राईले भुवन नगरकोटेलाई पुरस्कार राशीमा पछि पार्दै आगामी सिजनको नम्बर वान बन्ने दौडमा छन् ।
भुवनले हालसम्म ५ लाख १३ हजार ५ सय रुपैयाँ कमाएका छन्। शुक्रले ४ लाख ९४ हजार कमाएका छन्। शुक्रले यो सिजनको सात मध्ये दुई प्रतियोगिता खेलेनन्। तेस्रो स्थानमा रहेका सञ्जय लामाले ३ लाख ५२ हजार ५ सय, चौथो स्थानमा रहेका दिनेश प्रजापतिले ३ लाख ६५ हजार, पाँचौ स्थानमा रहेका जयराम श्रेष्ठले २ लाख ९४ हजार ७५० रपैयाँ कमाएको दीपक आर्चायले बताए ।
सूर्य नेपाल प्रिमियर गल्फ च्याम्पियनसिपको कुल पुरस्कार राशी १५ लाख २० हजार रुपैयाँ राखिएको छ। प्रतियोगिताको विजेताले २ लाख ७० हजार तथा उपविजेताले १ लाख ७० हजार रुपैयाँ पाउनेछन्। तेस्रोले १ लाख २० हजार, चौथो हुनेले १ लाख र पाँचौ हुनेले ८६ हजार रुपैयाँ पाउनेछन्। शीर्ष २१ भित्र पर्ने गल्फरले पनि नगद पुरस्कार पाउनेछन् । प्रतियोगितामा ४१ व्यवसायिक र ९ जना एमेच्योर खेलाडीले स्पर्धा गर्नेछन्।
