नेपाल प्रिमियर कपको उपाधि नजिक
काठमाडौं । नेपाल एसिसी प्रिमियर कपको फाइनलमा पुगेको छ । शनिबार कीर्तिपुरस्थित त्रिवि मैदानमा कुवेतविरुद्धको सेमिफाइनल खेल वर्षाका कारण रद्द भएपछि नेपाल फाइनलमा पुगेको हो ।
नेपालले दिएको २८१ रनको लक्ष्य पछ्याएको कुवेतले ८.३ ओभरमा ६ विकेटको क्षतिमा ३७ रन जोड्दा खेल वर्षाले रोकिएको थियो । वर्षा हुनुअघि नेपालका करण केसीले पाँच विकेट लिएका थिए ।
उनले ४.३ ओभरमा १ मेडन राख्दा १० रन खर्चिए। सोमपाल कामीले एक विकेट हात पारे । वर्षाले प्रभावित भएका कारण ४२ ओभरमा झारिएको खेलमा टस हारेर पहिले ब्याटिङ गरेको नेपालले ९ विकेटको क्षतिमा २८१ रन जोड्यो।
डिएलएस मेथडका कारण कुवेतले २८१ रनकै लक्ष्य पायो । नेपालका लागि कप्तान रोहित पौडेलले उत्कृष्ट ब्याटिङ गरे। उनले ९४ रन जोडे। ९५ बल खेलेका रोहितले ७ चौका र ३ छक्का प्रहार गरे । कुशल मल्लले पनि अर्धशतक प्रहार गर्न सफल भए। कुशलले ४४ बलमा समान ४–४ चौका र छक्का हिर्काउँदै ५७ रन जोडे । अब नेपालले सोमबार हुने फाइनलमा युएई र ओमानबीचको दोस्रो सेमिफाइनलको विजेतासँग खेल्नेछ ।