कतारलाई पराजित गर्दै प्रिमियर कपमा नेपाल सेमिफाइनलमा
काठमाडौं । एसीसी प्रिमियर कपमा नेपालले कतारलाई पराजित गरेको छ । बिहीबार भएको खेलमा कतारलाई ६८ रनले हराउँदै नेपाल समूह विजेता बनेको हो ।
नेपालले दिएको एक सय ५८ रनको लक्ष्य पछ्याएको कतार ओभरमा रन बनाउँदा अलआउट भयो । कतारका जहीर इब्राहिम र खुर्रम शहजादले समान १५/१५ रन बनाए । बलिङतर्फ नेपालका सन्दीप लामिछानेले ५, सोमपाल कामीले ३ र ललित राजवंशीले २ विकेट लिए । यसअघि त्रिवि क्रिकेट मैदानमा टस हारेर ब्याटिङ गरेको नेपाल ४० ओभर ३ बलमा १ सय ५७ रनमा अलआउट भयो । नेपालका सन्दीप लामिछानेले सर्वाधिक नटआउट ४२ रन बनाए ।
यस्तै कप्तान रोहित पौडेलले २७ रन बनाए । कतारका आमिर फरूकले ४ र ओइस अहमदले ३ विकेट लिए । नेपाल ४ खेलमा ७ अङ्कसहित समूह विजेता बनेको हो । नेपाल यसअघि नै सेमिफाइनलमा पुगिसकेको थियो ।
प्रतियोगिताको पहिलो सेमिफाइनलमा समूह ’ए’ को विजेताले समूह ’बी’ को उपविजेतासँग खेल्नेछ । यस्तै दोस्रो सेमिफाइनलमा समूह ’बी’ को विजेताले समूह ’ए’ को उपविजेतासँग खेल्नेछ ।
