राष्ट्रिय क्रिकेट टोलीका तीन खेलाडीलाई तिलोत्तमा नगरपालिकाद्वारा सम्मान
बुटवल । रुपन्देहीको तिलोत्तमा नगरपालिकाले राष्ट्रिय क्रिकेट टोलीका तीन खेलाडीलाई नगदसहित सम्मान गरेको छ ।
आइसीसी विश्वकप लिग–२ मा उत्कृष्ट खेल प्रदर्शन गरि नेपाललाई विजयी बनाउन महत्वपूर्ण भुमिका निर्वाह गरेका ओपनर ब्याट्सम्यान कुशल भुर्तेल, राष्ट्रिय टोलीमा सहभागी मौसम ढकाल र यू–१९ क्रिकेटका क्याप्टेन देव खनाललाई आइतबार सम्मान गरिएको हो ।
नगरपालिकाले तीनैजना खेलाडीलाई जनही ५० हजार नगदसहित सम्मान गरेको हो । दुई राष्ट्रिय खेलाडी सम्मिलित सिनीयर टोलीले विश्वकप छनोट खेल्न पाउने भएको छ भने यू–१९ का क्याप्टेन खनालले टिमलाई जित दिलाउँदै सन् २०२४ मा श्रीलंकामा हुने यू–१९ विश्वकपका लागि छनोट गराउन सफल भएका छन् ।
कार्यक्रममा तिलोत्तमा नगरप्रमुख रामकृष्ण खाँणले तिलोत्तमालाई क्रिकेटको हबको रुपमा विकास गर्न सकिने सम्भावना रहेको उल्लेख गरे। आफ्नो स्रोत र साधनले भ्याएसम्म तिलोत्तमाले खेलकूदको क्षेत्रमा लगानी गरेको बताए।