म्यानचेस्टर,आर्सनल र रोमा युरोपा लिगको क्वार्टरफाईनलमा प्रवेश
म्यानचेष्टर युनाईटेड, आर्सनल, रोमा र आयाक्स युरोपा लिग फुटबलको क्वार्टरफाईनलमा प्रबेश गरेका छन् । अन्तिम १६ को दोस्रो लेगमा एसी मिलानलाई १–० ले हराउदै म्यान युनाईटेडले समग्रमा २–१ को नतिजासंगै अन्तिम आठमा स्थान बनाएको हो ।
मिलानको मैदानमा युनाईटेडलाई जित दिलाउन खेलको ४८ औ मिनेटमा पउल पोग्वाले गरेको एक मात्र गोल निर्णायक बन्यो । युनाईटेडको मैदानमा भएको पहिलो लेग एक एक गोलको बराबरीमा सकिएको थियो ।
दोस्रो लेगमा ओलम्पियाकोससंग १–० ले पराजित भएपनि आर्सनल समग्रमा ३–२ ले हराउदै क्वार्टरफाईनलमा प्रबेश गरेको छ । पहिलो लेगमा निकालेको ३–१ को नतिजाले आर्सनलको अन्तिम आठ यात्रा संभव भएको हो ।
साख्तार डोनेत्स्कलाई २–१ ले हराउदै रोमाले समग्रमा ५–१ को नतिजा आत्मसात गर्यो । अन्य खेलहरुमा जित निकाल्दै स्लाभिया प्राग, भियारियल र आयाक्स अघिल्लो चरणमा प्रबेश गरेका छन् ।
दोस्रो लेगमा मोल्डेसंग २–१ ले पराजित भएपनि ग्रानाडा समग्रमा ३–२ को नतिजा निकाल्दै क्वार्टरफाईनलमा प्रबेश गर्यो । दोस्रो लेगमा टटनह्यामबिरुद्ध ३–० को फराकिलो जित निकाल्दै डाईनामो जाग्रेभले ३–२ को पुनरागमन नतिजा हात पार्यो । पहिलो लेगमा टटनह्याम २–० ले विजयी भएको थियो ।
