प्रिमियर लिगमा म्यानचेष्टर सिटीको सानदार जित
म्यानचेष्टर सिटीले प्रिमियर लिगको उपाधि यात्रा बलियो बनाएको छ । पछिल्ला २१ खेलमा अपराजित रहेको सिटीले लिगको पछिल्लो खेलमा वुल्भरहेम्प्टनलाई ४–१ को फराकिलो अन्तरले हरायो ।
ग्राबियल जेससले २ तथा रियाद महारेजले एक गोल गर्दै सिटीलाई जित दिलाए । ईतिहात स्टेडियममा भएको खेलमा अर्को गोल उसले उपहारस्वरुप पाएको थियो । वुल्भरका कोनोर क्वाडेले एक गोल फर्काए । खेलको १५ औ मिनेटमा उपहार गोलमा अग्रता बनाएको सिटीबिरुद्ध क्वाडेले ६१औ मिनेटमा बराबरी गोल फर्काएका थिए । तर खेलको अन्तिम १३ मिनेटमा लगातार तीन गोल गर्दै सिटीले शानदार जित निकाल्यो ।
जेससले ८० औ मिनेटमा गोल गर्दै सिटीलाई दोस्रो पटक अग्रता दिलाए । ९० औ मिनेटमा महारेजले गोल गरेपछि सिटी ३–१ को बलियो अबस्थामा पुग्यो । ईन्ज्युरी समयमा जेससले ब्यक्तिगत दोस्रो गोल गरेपछि सिटी सहज जित निकाल्न सफल बन्यो ।
२७ खेलबाट सिटी ६५ अंकमा तालिकाको शीर्ष स्थानमा जमेर बसेको छ । यो दोस्रो स्थानको म्यानचेष्टर युनाईटेड भन्दा १५ अंकले अघि हो । गत डिसेम्बर १५ मा वेष्टब्रोमसंग बराबरी खेलेयता सिटी सबै खेलमा अपराजित छ । प्रिमियर लिगमा आज लेष्टर सिटी र बर्नली, एष्टन भिल्ला र सेफिल्ड युनाईटेड तथा म्यानचेष्टर युनाईटेड र क्रिष्टल प्यालेस प्रतिस्पर्धा गर्नेछन् ।
