पहिलो पुस्ताका फुटबल खेलाडी इन्द्रसिंह सुब्बाको निधन
काठमाडौं । नेपाली फुटबल टोलीका पहिलो पुस्ताका खेलाडी इन्द्रसिंह सुब्बाको निधन भएको छ । सुब्बाको ८४ वर्षको उमेरमा बाँसबारीस्थित गंगालाल हृदय केन्द्रमा मंगलबार निधन भएको हो । मुटुमा समस्या देखिएपछि उनलाई केन्द्रमा भर्ना गरिएको थियो । नेपालले पाकिस्तानमा सन् १९६३ मा आगाखाँ गोल्डकप अन्तर्राष्ट्रिय प्रतियोगिता खेल्दा सुब्बा उक्त टोलीमा थिए ।
नेपालले खेलेको अन्तर्राष्ट्रिय प्रतियोगिता त्यही नै पहिलो थियो । नेपाली टोलीको कप्तान त्यस बेला नरशमशेर जबरा थिए । सुब्बा भारतको दार्जिङमा जन्मिएका थिए । पछि फुटबल खेल्न नेपाल आएका हुन् । उनी बाँचुञ्जेल काठमाडौँमैँ बसे ।
अखिल नेपाल फुटबल सङ्घ (एन्फा)का प्रवक्ता किरण राईले विभिन्न रोगले च्यापेपछि सुब्बालाई एक महिनाअघि ललितपुरको अल्का अस्पताल भर्ना गरिएको बताए । पछि मुटुमा समस्या देखिएपछि उनलाई केन्द्रमा भर्ना गरिएको थियो ।
