स्पेनिस फुटबल प्रशिक्षकको कोरोनाभाइरसका कारण मृत्यु
स्पेनिस फुटबल प्रशिक्षकको कोरोनाभाइरसका कारण मृत्यु भएको छ । आइतबार प्रशिक्षक फ्रान्सिस्को गार्सियाको कोरोनाभाइरसका कारण मृत्यु भएको हो ।
२१ वर्षीय गार्सिया मालागा सहरको एट्लेटिको पोर्टाडा अल्टा क्लबको युवा टिमको प्रशिक्षक थिए । सन् २०१६ देखि प्रशिक्षक रहेका गार्सिया कोरोनाका कारण मालागा क्षेत्रमा मृत्यु हुनेमा पाँचौ र कान्छा व्यक्ति बनेका छन् । उनलाई गत साता कोरोना भएको पुष्टि भएको थियो। कोरोना भएपछि उनलाई मालागाको क्षेत्रीय अस्पतालमा भर्ना गरिएको थियो । प्रशिक्षकको मृत्यु भएपछि क्लबले सामाजिक सञ्जालमार्फत दुख व्यक्त गरेको छ ।
कोरोनाका कारण स्पेनका सबै लिग स्थगित गरिएका छन् । स्पेनमा अहिलेसम्म ९ हजार भन्दा बढीलाई कोरोना भएको पुष्टि भइसकेको छ भने ३ सय ९ जनाको मृत्यु भइसकेको छ ।