मेलबर्न रेनेगेड्सलाई मेलबर्न स्टार्सद्वारा ७ विकेटले पराजित
अस्ट्रेलियामा जारी बिग व्यास लिग अन्तर्गत खेलमा मेलबर्न रेनेगेड्सलाई मेलबर्न स्टार्सले ७ विकेटले पराजित गरेको छ। आज रेनेगेड्सले दिएको १६८ रनको लक्ष्य स्टार्सले १८ दशमलव ४ ओभरमा ३ विकेट गुमाएर पुरा गर्यो।
मेलबर्नलाई जिताउन ग्लेन म्याक्सवेलले सर्वाधिक ८३ रन बनाए। त्यस्तै हिल्टन कार्टराइटले ३५ तथा निक लार्किनले ३३ रनको योगदान गरे।
यसअघि मेलबर्न (डकल्यान्डमा) मा भएको खेलमा स्टार्सले टस जितेर रेनेगेड्सलाई ब्याटिङको निम्ता दिएको थियो। रेनेगेड्सले निर्धारित २० ओभरमा ७ विकेट गुमाउँदै १६८ रन बनायो।
खेलमा नेपाली स्पिनर सन्दीप लामिछानेले २ विकेट लिएका छन्। मेलबर्न स्टार्समा आबद्ध लामिछानेले आज ४ ओभर बलिङ गर्दै ३९ रन दिएर २ विकेट लिएका हुन्।
रेनेगेड्सका लागि शाउन मार्सले सर्वाधिक ६३ रन बनाए। ४३ बलमा ६३ रन बनाएर क्रिजमा जमिरहेका मार्सलाई लामिछानेले पभेलियन फर्काउँदै टिमलाई राहत दिलाए।
