काठमाडौंमा व्यावसायिक फाइट आयोजना ,विजय हासिल गर्नेले जनही ५० हजार रूपैयाँ पुरस्कार पाउने
काठमाडौं । काठमाडौंमा कम्ब्याट स्पोर्टस्का खेलाडीलाई लक्षित गर्दै व्यावसायिक फाइट आयोजना गर्ने भएको छ । जिमखाना मुवाँ थाईले शनिबार काठमाडौंमा कम्ब्याट स्पोर्टस्का खेलाडीलाई लक्षित गर्दै व्यावसायिक फाइट आयोजना गर्ने भएको हो ।
शनिबार साँझ ठमेलस्थित लर्डस अफ दी ड्रिंक्स (एलओडी)मा हुने जिमखाना फाइट नाइटको दोस्रो संस्करणमा बक्सिङ र मुवाँ थाईका चार / चार गरी कुल ८ फाइट हुनेछन्। प्रत्येक फाइटमा विजय हासिल गर्नेले जनही ५० हजार रूपैयाँ पुरस्कार पाउनेछन् भने पराजित हुनेले म्याच फी स्वरूप २५ हजार रूपैयाँ पाउने आयोजकले शुक्रबार पत्रकार सम्मेलनमा जानकारी गराएको छ ।
नेपाल बक्सिङ संघ र नेपाल राष्ट्रिय मुवाँ थाई संघको सहकार्यमा हुन लागेको फाइटअन्तर्गत बक्सिङमा चार तथा मुवाँ थाईमा चार भिडन्त हुनेछन् । आयोजकले यो वर्षदेखि प्रत्येक दुई महिनामा यस्तै प्रतियोगिता आयोजना गर्ने जनाएको छ ।
