एसीसी इमर्जिङ कपमा नेपाल भारतसँग पराजित
काठमाडौं । एसीसी इमर्जिङ टिम्स एसिया कप क्रिकेटको पहिलो खेलमा नेपाल भारतको इमर्जिङ टोलीसँग पराजित भएको छ । ढाकामा बिहीबार भएको पहिलो खेलमा नेपाल भारतको यू–२३ टिमसँग सात विकेटले पराजित भएको हो ।
ढाकास्थित बंगलादेश कृरा शिक्खा मैदानमा नेपालले दिएको १९४ रनको लक्ष्य भारतले ४२ ओभरमा मात्र तीन विकेट गुमाएर पूरा गरेको थियो । भारतलाई जित दिलाउन शनबिर सिंह र अर्मान जाफरले अर्धशतकीय पारी खेले ।
शनबिरले ५६ रनको अर्धशतकीय इनिङ्स खेल्दा अर्मानले अविजित रहँदै ५१ रनको अर्धशतकीय पारी खेले । यस्तै बेलुर रभी सरथले ४९ रन जोड्दा आर्यन जुएलले २९ रन बनाए ।बलिङतर्फ नेपालका लागि करण केसी, सुशन भारी र ललित नारायण राजवंशीले एक–एक विकेट लिए ।
यसअघि टस हारेर पहिले ब्याटिङ गरेको नेपालले ४४ ओभर ५ बलमा विकेट गुमाउँदै १९३ रन बनाएको थियो । नेपालका लागि पवनले अर्धशतकीय पारी खेलेका थिए ।
छैटौं नम्बरमा ब्याटिङ गर्न आएका उनले ४९ बल खेल्दै ७ चौका र २ छक्काको सहयोगमा ५६ रन पूरा थिए । यसअघि १९ ओभरको खेल सकिँदा नेपालले तीन विकेट गुमाएर मात्र ५८ रन बनाएको थियो । नेपालका लागि शरद भेषावकरले ४४ रन बनाएर आउट भएका थिए । त्यस्तै दिपेद्र ऐरी २४ रन बनाएर आउट भए ।
नेपालले पहिलो विकेटको रुपमा कप्तान ज्ञानेन्द्र मल्ललाई शून्य रनमा गुमाएको छ । दुई बलको सामना गरेका मल्ल पहिलो ओभरको दोस्रो बलमा सौरभ दुबेको बलमा बोल्ड आउट भए ।
