सन्दीप लामिछाने दुई करोड रुपैयाँ बराबरको दुईवटा प्रतियोगितामा अनुबन्ध
काठमाडौं । नेपाली युवा लेग स्पिनर सन्दीप लामिछाने दुईवटा प्रतियोगितामा अनुबन्ध भएका छन् । इंग्ल्याण्ड र वेल्समा आयोजना हुने ‘द हन्ड्रेड’ क्रिकेट र यूएईमा हुने टि–टेन र प्रतियोगिताका लागि अनुबन्ध भएका सन्दीपले करिब २ करोड रुपैयाँ पाउने छन् ।
‘द हन्ड्रेड’ क्रिकेट प्रतियोगितामा बर्मिङ्घम फिनिक्सबाट खेल्ने सन्दीपले १ लाख पाउण्ड अर्थात करिब १ करोड ४६ लाख पाउनेछन् भने टि–टेनमा ४५ हजार अमेरिकी डलर अर्थात् ५१ लाख रुपैयाँ पाउने छन् ।
विभिन्न फ्रेन्चाइज लिगमा अनुबन्ध भइरहेका लामिछानेको यो नै अहिलेसम्मको मंहगो मूल्य हो । एक सय बलको हुने द हन्ड्रेड प्रतियोगिता २०२० को १७ जुलाईदेखि अगष्टसम्म चल्नेछ । टि–टेन भने नोभेम्बरबाट सुरु हुनेछ । टि–टेनमा सन्दीप कर्नाटक टस्कर्सबाट खेल्नेछन् ।
