आर्थिक लेनदेनको विषयमा झापामा साथीको हत्या
झापा । झापाको शिवसताक्षी नगरपालिका ११ स्थित सताक्षी धाम जाने भित्री सडक खण्डमा स्थानीय गोमनसिंह मगरको आफ्नै साथीले हत्या गरेको पुष्टि भएको छ । मगरको हत्या गरी फरार रहेका शिवसताक्षी ८ का ३२ बर्षीय मनकुमार लिम्बुलाई प्रहरीले पक्राउ गरेको छ । लिम्बुले भदौ १६ गते साँझ साढे ६ बजे गोमन सिंहलाइ घुम्न जाउँ भनि घरबाट बोलाएका थिए ।
साथीले बोलाएपछि मोटरसाईकलमा आएका गोमन सिंहलाई सताक्षी धाम मन्दिरतर्फ हावा खान जाऔं भनि उनी सोही मोटरसाईकल पछाडी बसी घटनास्थलतर्फ लिई गएका थिए ।
मोटरसाईकल पछाडि बसेकै बेला लिम्बुले धारिलो हतियारले घाँटीमा रेटी हत्या गरेको अनुसन्धानबाट खुल्न आएको जिल्ला प्रहरी कार्यालय झापाले जनाएको छ ।
लिम्बुले हत्यामा प्रयोग गरेको कर्द र उनले बोकेको मोबाईल समेत बरामद गरिएको छ । उनीहरुबीच भएको आर्थिक लेनदेन कारोबारमा असमझदारी भई बढेको मनमुटाबले हत्या भएको प्रारम्भिक अनुसन्धानको क्रममा खुल्न आएएको प्रहरीले जनाएको छ ।
