क्यान्सर पीडित तामाङलाई ३२ हजार आर्थिक सहयोग
काठमाडौं । सिन्धुपाल्चोकको सुनकोशी गाउँपालिका ५ घर भएका क्यान्सर पीडित पूर्वजनमुक्ति सेना नेपालका कम्पनी कमान्डर नैनबहादुर तामाङ (जमिन) लाई उपचार गर्न आर्थिक सहयोग जुट्ने क्रम बढेको छ ।
बौंद्ध धर्म गुरु तथा समाजसेवी कोशिश लोब्साङ वाईबा तामाङले बुधबार लामो समयदेखि भक्तपुर क्यान्सर हस्पिटलमा क्यान्सर उपचार गराईरहेका तामाङको कोठामा पुगेर ३२ हजार आर्थिक सहयोग हस्तान्तरण गरेका हुन् ।
पीडितको आर्थिक अवस्था कमजोर भएका कारण आफूले विभिन्न स्थानमा रहेका आफ्नो बौंद्ध धर्म शिक्षा सम्बन्धि अनलाइन शिक्षा लिने प्रशिक्षार्थीहरुबाट संकलित आर्थिक सहयोग प्रदान गरेको तामाङले बताए ।
उक्त अवसरमा समाजसेवी वाईबाले मानवसेवा ठूलो धर्म भएकाले मानवसेवाका लागि थोरै भए पनि सहयोग गरेको बताए । “आगामी दिनमा पनि गरीब, दुःखीका लागि यस्तो सहयोग गर्ने”, उनले भने ।
घरपरिवारको आर्थिक स्थिति निकै कमजोर रहेको र आर्थिक अभावका कारण उपचारमा समस्या भएकाले तामाङले जीवनरक्षा तथा उपचारका लागि अत्यावश्यक आर्थिक सहयोग र सहायताका लागि सम्पूर्ण जिम्मेवार संघसंस्थाहरु तथा मनकारी जनसमुदायहरुमा साथ र सहयोगका लागि अपिल गरेका छन् । तामाङको उपचारमा सहयोग गर्न चाहनेले यो ९८४९३७०२१२ नम्बरमा सम्पर्क गर्न सक्नुहुनेछ ।
