लमजुङको मस्र्याङ्दी गाउँपालिकामा पहिरोमा परी १८ घर पूर्णरुपमा क्षतिग्रस्त
लमजुङ । लगातारको अविरल बर्षासँगै उत्तरी लमजुङको मस्र्याङ्दी गाउँपालिका –३ खुदी पल्लोटारीमा भीषण पहिरो जाँदा १८ घर पूर्ण रुपमा क्षतिग्रस्त भएका छन् । बुधबार बिहान ९ बजे आएको भीषण पहिरोमा परी ८० घरपरिवार बिस्थापित भएका छन् । पहिरोमा परी ८ जना घाईते भएका प्रहरीले जनाएको छ ।
घाईतेहरुलाई स्थानीय खुदी स्वास्थ्य चौकीमा उपचार गराईरहेको र गम्भीर घाईते दुई जनालाई भने सदरमुकामस्थित जिल्ला सामुदायिक अस्पतालमा थप उपचारका लागि रिफर गरिएको छ ।
यतिवेला प्रहरी र स्थानीयहरुको टोलीले पहिरोबाट जोगिएका सामाग्रीहरु संकलन गर्ने काम गरिरहेका छन् । पहिरोबाट बिस्थापित भएकाहरुलाई स्थानीय सामुदायिक भवन, सामुदायिक विद्यालयमा राख्ने तयारीमा जुटेको मस्र्याङ्दी गाउँपालिकाले जानकारी दिएको छ ।
फोटोः सृजना बरालको फेसबुकबाट
