कोरोनालाई जितेर म्याग्दीका १४ जना एकै दिन डिस्चार्ज
म्याग्दी । म्याग्दीको बेनीस्थित आइसोलेसनमा रहेका १४ जना कोरोना सङ्क्रमित एकै पटक कोरोनालाई जितेर घर फर्केका छन् । हालसम्म ४० जनामा सङ्क्रमण पोजिटिभ आएको म्याग्दीमा ३४ जना कोरोना जितेर घर फर्किएका छन् ।
आइसोलेसनमा बसेकामध्ये मालिका गाउँपालिकाका पाँच जना, बेनी नगरपालिकाका दुई जना, मङ्गला गाउँपालिकाका दुई जना, रघुगङ्गाका तीन जना तथा अन्नपूर्ण गाउँपालिकाका एक जना कोरोना जितेर घर फर्केका छन् ।
साउन ४ गते बिहान छ जनामा कोरोना पोजिटिभ देखिएसँगै आइसोलेसन भरिएकोमा ४ गते राति १४ जनाको नेगेटिभ आएपछि उनीहरू डिस्चार्ज भएसँगै आइसोलेसनमा छ जना मात्रै बाँकी रहका जनस्वास्थ्य कार्यालय म्याग्दीका निमित्त प्रमुख एकनारायण लम्सालले जानकारी दिए ।
सोमबार १४ जना डिस्चार्ज भएसँगै म्याग्दीमा कोरोना निको हुनेहरू ३४ पुगेका छन् भने आइसोलेसनमा छ जना उपचाररत छन् । बेनीमा तीन ठाउँमा रहेको क्वारेन्टाइनमा विदेशबाट आएर एक महिलासहित १२० जना बसेका छन् ।
