राष्ट्रिय सेवा दल एल्मुनाई काठमाडौद्वारा राहत वितरण
काठमाडौं । विश्वव्यापी महामारीको रुपमा फैलिएको कोभिड १९ को कारण नेपाल सरकारद्वारा लकडाउन जारी गरेको एक महिना भन्दा बढी भइसकेको छ । जसकारण गरीव, श्रमिक, ज्यालादारी मजदूर परिवार मात्र नभई आमसर्वसाधारणको घरको खानेकुराहरू सकिने अवस्थामा छ । प्रत्येक दिन बिहान र बेलुका के खाने भन्ने समस्या सिर्जना भईसकेको छ ।
सोही कुरालाई मध्यनजर गरी, रास्ट्रिय सेवा दल एल्मुनाई एशोसियसन काठमाडौ जिल्ला कार्य समितिले राहत वितरण गरेको छ । निर्देशक ज्योती थापाको निर्देशनमा चण्डी दल गण र दुर्गा बक्स गणसँग समन्वय गरी राष्ट्रिय सेवा दलको जुनियर र सिनियर डिभिजन तालिम गरेका क्याडेट छात्र छात्राहरूको उपस्थितिमा राहत वितरण गरिएको हो ।
एशोसिएसनले काठमाडौं महानगरपालिका वडा नम्बर नौ बानेश्वरस्थित नमुना सुकुम्बासी बस्तीमा सोमबार राहत वितरण गरेको छ । बर्षाले गर्दा असहज परिस्थितिका कारण उपस्थित सर्वसाधारणको हुल मिलाउन हम्मे परे पनि क्याडेट भाइबहिनीहरुले राम्रो भूमिका निर्वाह गर्दा राहत वितरण गर्न सजिलो भएको एल्मुनाइ कार्य समिति निर्देशक ज्योति थापाले बताइन् ।
काठमाडौ जिल्लामा मात्रै नभई रुपन्देही, मोरङ लगायत देशका विभिन्न जिल्लामा राष्ट्रिय सेवा दल क्याडेटहरुले कतै राहत वितरण गरेर त कतै स्वयंसेवक बनेर सुरक्षा निकायलाई सहयोग गर्दै आइरहेका छन् ।
