आफूलाई अपहरण गरिएको भन्दै सांसद यादवले दिए आयोगमा उजुरी

काठमाडौं । समाजवादी पार्टीका सांसद डा. सुरेन्द्र यादवले आफूलाई महोत्तरीबाट अपहरण गरी काठमाडौं ल्याएको भन्दैे नेकपाका सांसदद्वय महेश बस्नेत, कृष्णकुमार श्रेष्ठ र पूर्वआइजिपी सर्वेन्द्र खनालविरूद्ध मानव अधिकार आयोगमा निवेदन दिएका छन् । बिहीबार पुल्चोकस्थित मानव अधिकार आयोग पुगेर सांसद यादवले आफूलाई अपहरण गरेको भन्दै निवदेन दिएका हुन् ।

‘सत्ता र शक्तिका आडमा उनीहरूले मेरो ज्यान लिन सक्ने अझै पनि जोखिम छ,’ सांसद यादवले दिएको निवेदनमा भनिएको छ, ‘सांसदद्वय बस्नेत र श्रेष्ठ तथा पूर्वआइजिपी खनाललाई पक्राउ गरी आवश्यक छानबिन र कारबाही गर्नुपर्छ।’ काठमाडौंबाट गएका सांसदद्वय बस्नेत, श्रेष्ठ र पूर्वआइजिपी खनालले सांसद यादवलाई वैशाख १० गते काठमाडौं ल्याएका थिए ।

अपहरण गरी बन्धक बनाइ काठमाडौं ल्याएको भन्दै उनले यसअघि महानगरीय प्रहरी परिसर, टेकुमा निवेदन दिन गएपनि प्रहरीले दर्ता गर्न अस्वीकार गर्दै महोत्तरी जान सुझाव दिएको थियो । त्यस्तै प्रहरीले जोहेरी दर्ता गर्न अस्वीकार गरेको भन्दै सरकारी वकिलको कार्यालय काठमाडौंमा किटानी जाहेरी दिन जाँदा पनि निवेदन दर्ता गरिएको थियो ।