धनुषामा विषाक्त मदिरा सेवनबाट मृत्यु भएकाका परिवारलाई ३/३ लाख रुपैयाँ दिइने
जनकपुरधाम । विषाक्त मदिरा सेवनबाट धनुषाको क्षिरेश्वरनाथ नगरपालिका रमदैयाका मृतकका परिवारलाई प्रदेश सरकारले ३/३ लाख रुपैयाँ राहत उपलब्ध गराउने भएको छ ।
सोमबार विहान रमदैया पुगेका मुख्यमन्त्री लालबाबु राउतले पीडित परिवारप्रति समवेदना व्यक्त गर्दै प्रतिमृतक ३/३ लाख राहत रकम उपलब्ध गराउने घोषणा गरेका हुन् ।
विषाक्त मदिरा विक्री वितरण तथा उत्पादन गर्ने जो कोहीलाई पनि कानूनको दायरामा ल्याउने प्रतिवद्धता व्यक्त गर्दै मुख्यमन्त्री राउतले घटनामा संलग्नहरुको खोजी कार्य जारी रहेको बताए । उनले प्रदेश सरकार चाडै प्रदेशलाई खुला मदिरा मुक्त घोषणा गर्ने तयारीमा रहेको समेत बताए । विषाक्त मदिरा सेवनबाट धनुषामा १७ जनाको मृत्यु भएको थियो ।