साढे दुई किलो सुनसहित रसुवाबाट ६ जना पक्राउ
रसुवा । रसुवाको रसुवागढी नाकाबाट अवैध रुपमा नेपाल भित्राइएको साढे दुई किलो सुन बरामद भएको छ । सुन ल्याइँदै गरेको सुराकीका आधारमा सीमा प्रहरीचौकीको प्रहरी टोलीले ना १ ज ३५४२ नम्बरको जीप खानतलासी गरी सुन बरामद गरेको हो ।
साढे दुई किलो सुनमध्ये एक किलो चालकले कम्मरमा बाँधेको र डेढ किलो चालकको सिटमुनि लुकाइएको अवस्थामा फेला परेको प्रहरीले जनाएको छ ।
पक्राउ पर्नेमा चालक तुलानारायण श्रेष्ठ, सिन्धुपाल्चोक भोटेकोशीका नवाङनुर्पु तामाङ, ग्याल्जेन शेर्पा, सुब्बा लामा, सुवास तामाङ र साङ शेर्पा रहेका प्रहरी प्रमुख इन्द्रप्रसाद सुवेदीले जानकारी दिए । सुनको मूल्य एक करोड ६० लाख रुपैयाँ रहेको बताइएको छ ।
