८ लाख रुपैयाँ घुससहित गाउँपालिकाका अध्यक्ष पक्राउ

सुर्खेत । अख्तियार दुरूपयोग अनुसन्धान आयोगको कार्यालय सुर्खेतको टोलीले जाजरकोटको जुनीचाँदे गाउँपालिकाका अध्यक्ष कृष्ण बहादुर केसीलाई ८ लाख रुपैयाँ घुससहित पक्राउ गरेको छ । उनलाई शुक्रबार दिउँसो वीरेन्द्रनगर–७ स्थित कटकुवा स्वास्थ्य चौकी नजिकबाट अख्तियारको टोलीले पक्राउ गरेको हो ।

अध्यक्ष केसीले सडक निर्माण गरेका उपभोक्ता समितिको बिल पास गराइदिने र यसबापत घुस आफूलाई दिनुपर्ने बताएपछि उजुरी अख्तियार दुरूपयोग अनुसन्धान आयोगको कार्यालय परेको थियो ।

उजुरीका आधारमा अख्तियार दुरूपयोग अनुसन्धान आयोगको कार्यालयले टोली पठाएर उनलाई घुस लिँदालिँदै पक्राउ गरेको हो । अध्यक्ष केसीसँगे जुनीचाँदे गाउँपालिकाकै चन्द्र बहादुर बस्नेत पनि पक्राउ परेका छन् । पक्राउ परेका दुवै जनामाथि थप अनुसन्धान भइरहेको अख्तियार दुरूपयोग अनुसन्धान आयोगको कार्यालयका सूचना अधिकारी मेघनाथ सापकोटाले जानकारी दिएका छन् ।