फोहोरमैलाको उचित व्यवस्थापनका लागि प्रविधि आवश्यक
काठमाडौं । सहरी विकास राज्यमन्त्री रामवीर मानन्धरले फोहोरमैलाको उचित व्यवस्थापनका लागि प्रविधिसँग जोडिनुपर्ने बताएका छन् । फोहोरमैला व्यवस्थापन सम्बन्धि राष्ट्रिय सम्मेलनलाई सम्बोधन गर्दै राज्यमन्त्री मानन्धरले यस्तो बताएका हुन् ।
प्रविधिसँग जोडिन नसकेका कारण अहिलेको अवस्था आएको भन्दै उनले प्रविधि भित्राउँदा कसैलाई घाटा नहुने बताए । काठमाडौं महानगरपालिकाका प्रमुख प्रशासकीय अधिकृत केदार न्यौपानेले फोहोर सिसडोल पुर्याउनु भन्दा पहिले नै कुहिने र नकुहिने फोहोर छुट्याउनुपर्ने बताए ।
देशमा हरेक वर्ष रासायनिक मल आयातमा ठूलो रकम बाहिर गएको उल्लेख गर्दै उनले कुहिने फोहोरलाई मल बनाउएर प्रयोग गर्न सकिने बताए ।
फोहोरमैला व्यवस्थापन सम्बन्धि राष्ट्रिय सम्मेलनका संयोजक गणेश साहले शहरको विकास भइरहेकै गतिमा फोहोर पनि बढिरहेको बताए । उनले देश संघीय संरचनामा गएपछि फोहोर व्यवस्थान कसको जिम्मा हुने भन्ने नै स्पष्ट नभएको बताए ।
