बाँकेको कोहलपुरमा सशस्त्र प्रहरीको स्कुल स्थापना
बाँके । सशस्त्र प्रहरीले बाँके कोहलपुर नगरपालिका–२ बर्दवामा एपिएफ स्कुल स्थापना गरेको छ । सशस्त्र प्रहरी महानिरीक्षक शैलेन्द्र खनालले बिहीबार सुरुवात गरेका छन् । विद्यालयमा यसै शैक्षिकसत्र देखि अनलाईन विधिबाट कक्षा ४ र ५ का विद्यार्थी छनोट गरी कुल ५८ जना विद्यार्थीलाई अनलाईन कक्षा संचालन भईरहेको छ ।
महानिरीक्षक खनालले राजधानी बाहिर यस्ता विद्यालय संचालन गरिँदा सशस्त्र प्रहरी कर्मचारी एवं स्थानीय नागरिकका सन्ततीको गुणस्तरीय शिक्षादीक्षामा योगदान पुग्ने बताए ।
उनले प्रदेश स्तरमा विस्तार गर्नुपर्ने आवश्यकतालाई ध्यानमा राखी विद्यालय संचालनमा ल्याईएको बताए । उनले शिक्षा सभ्य समाज निर्माणको आधारशिला भएको तथा शिक्षाको विकास सँगै राष्ट्र समृद्धिको बाटोमा अगाडी बढ्ने उल्लेख गर्दै विकासशील देशमा शिक्षाको विकास समग्र राष्ट्रको विकासको मेरुदण्ड रहेको बताए ।
