प्रधानसेनापति थापाद्वारा खड्का र ढकाललाई उपरथीको दज्र्यानी चिन्ह प्रदान
काठमाडौँ । उपरथी दर्जामा पदोन्नति भएका सहायक रथी सन्तोष कुमार ढकाल र सहायक रथी सहदेव खड्कालाई प्रधानसेनापति पूर्णचन्द्र थापाले उपरथी दर्जाको दज्र्यानी चिन्ह प्रदान गरेका छन् । शुक्रबार जंगी अड्डामा आयोजित कार्यक्रममा प्रधानसेनापति थापाले ढकाल र खड्कालाई उपरथी दर्जाको दज्र्यानी चिन्ह प्रदान गरेका हुन् ।
मंसिर ३ गते बसेको मन्त्रिपरिषद् बैंठकले ढकाल र खड्कालाई सहायक रथीबाट उपरथीमा बढुवा गर्ने निर्णय गरेको थियो । नेपाली सेनाका अनुसार उपरथी ढकाललाई पूर्वी पृतना मुख्यालयको पृतनापति र उपरथी खड्कालाई राष्ट्रिय सुरक्षा परिषद्को सचिवालयमा पदस्थापन गरिएको छ ।
शुक्रबारै सोही कार्यक्रममा सहायक रथी दर्जामा पदोन्नति भएका अन्य चार जना महासेनानीहरुलाई पनि प्रधानसेनापति थापाले दज्र्यानी चिन्ह प्रदान गरेका छन् ।
