आगामी चुनावमा माओवादी पहिलो दल : महरा
रसुवा । पूर्वसभामुख कृष्णबहादुर महराले आगामी निर्वाचनमा नेकपा माओवादी केन्द्र पहिलो दल हुने दाबी गरेका छन् । उत्तरी रसुवाको आमा छोदिङ्मो गाउँपालिकास्तरीय पार्टीको प्रथम सम्मेलन शुभारम्भ गर्दै महराले अहिले यो दल दुब्लाएको जस्तो देखिए पनि आगामी निर्वाचनमा विसं २०६४ कै अवस्थामा फर्कने दाबी गरेका हुन् ।
अन्य दलमा जस्तो यस दलमा आन्तरिक कलह नभएको स्पष्ट पार्दै उनले आदीवासी, जनजाति, घले, गुरूङ, सबैक्षेत्रको वृहत्तर हितका लागि आफ्नो दल निरन्तर अगाडि बढ्ने बताए । माओेवादीले ल्याएको जनहितकारी एजेण्डा पूरा गर्न बाँकी रहेकोले आफ्नो दललाई विजय गराउन उनले स्थानीय समुदाय माझ आग्रह पनि गरे ।
टुक्रिएर गएका डा बाबुराम भट्टराई, वैद्य, विप्लव समेतका साथीलाई एकता गराउन सौहार्दपूर्ण वातावरणमा वार्ता अगाडि बढिसकेकाले रसुवा जिल्लामा पनि अन्यत्र गएका सबै साथी छिट्टृै मूलघारमै प्रवेश गरी नेकपा माओवादीलाई अत्याधिक मत दिएर उचाइमा पुर्याउने महराले विश्वास व्यक्त गरे ।
