प्रधानमन्त्री देउवा, प्रचण्ड र नेपालबीच छलफल
काठमाडौं । प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड र प्रस्तावित नेकपा एमाले समाजवादीका अध्यक्ष माधवकुमार नेपालबीच भेटवार्ता भएको छ ।
प्रधानमन्त्री देउवालाई भेट्न प्रचण्ड र नेपाल बिहीबार प्रधानमन्त्री निवास बालुवाटार पुगेका थिए । उनीहरुबीच पछिल्लो विकसित राजनीतिकाबारेमा कुराकानी भएको बताइएको छ ।
बुधबार मात्र नेकपा एमालेबाट छुट्टिएर नेकपा एमाले समाजवादी दल दर्ताका लागि निर्वाचन आयोगमा निवेदन दिएका नेपालले देउवा र प्रचण्डसँग सरकारमा सहभागिता तथा राजनीतिक दल विभाजन सहज हुनेगरी ल्याइएको अध्यादेशबारे छलफल गरेको बताइएको छ ।
प्रधानमन्त्रीका स्वकीय सचिव भानु देउवाले तीन नेताबीच समसमायिक राजनीतिक विषयमा छलफल भएको जानकारी दिएका छन् । देउवाले प्रधानमन्त्री भएको एक महिना बढी भइसक्दा पनि मन्त्रिपरिषद् विस्तार गर्न सकेका छैनन्।
अध्यादेश जारीबाट एमाले फुटेसँगै अब मन्त्रिपरिषद् विस्तार हुने बताइएको छ । उनीहरुबीच मन्त्रिपरिषद विस्तारबारे पनि छलफल भएको बताइएको छ ।
