नेपाल पक्षले बोलाएको बैठक अवैध रहेको ओली पक्षको जिकिर
काठमाडौं । नेकपा एमालेको केपी ओली पक्षले पार्टीका वरिष्ठ नेता माधवकुमार नेपाल पक्षले बिहीबारका लागि बोलाएको केन्द्रीय समिति बैठकमा जाने नेता कार्यकर्तामाथि कारबाही गर्ने चेतावनी दिएको छ ।
बुधबार पार्टी केन्द्रीय कार्यालय सचिव शेरबहादुर तामाङले विज्ञप्ति जारी गरी साउन २१ गते पार्टीको कुनै बैठक नभएकाले पार्टीका नामबाट हुने अनधिकृत बैठकमा सहभागी नहुन आग्रह गरेका हुन् । बैठकमा देशभरका केन्द्रीय सदस्यहरु सहभागी हुने नेपाल पक्षले बताएको छ । बैठकले पछिल्लो राजनीतिक अवस्था, आगामी दिनको रणनीतिलगायतका विषयमा धारणा तय गर्ने बताइएको छ ।
