महन्थ ठाकुरले आयोगमा कीर्ते निर्णय बुझाएको यादव पक्षको आरोप

काठमाडौं । जनता समाजवादी पार्टी (जसपा) को उपेन्द्र यादव पक्षले महन्थ ठाकुर पक्षमाथि कार्यकारिणी समितिको निर्णयमा कीर्ते गरेको आरोप लगाएको छ ।

जसपाको प्रचार विभाग प्रमुख डम्बर खतिवडाले शनिबार विज्ञप्ति जारी गरी ९ पुसमा बसेको बैठकले कार्यकारिणी समिति पुनगर्ठनको अधिकार ठाकुरलाई नदिएको प्रष्ट पारेका छन् ।

त्यसबेला भएको निर्णयमा अध्यक्षद्वय ठाकुर र यादवले हस्ताक्षर गरेर जिल्ला समितिदेखि भ्रातृ संगठनहरुलाई समेत पठाइएको भन्दै खतिवडाले हुँदै नभएको निर्णयलाई निर्णय भएको भनी ठाकुरले निर्वाचन आयोगमा पत्र दर्ता गराएको बताएका छन् ।

७ पुस २०७७ मा बसेको बैठकले कार्यकारिणी समिति हेरफेरको अधिकार आफूलाई दिएको र त्यसअनुसार नयाँ कमिटी बनाएको भन्दै अध्यक्ष महन्थ ठाकुर १ असारमा निर्वाचन आयोग गएका थिए । उनले कार्यकारिणी समितिको माइन्युटको कपी पेश गरेका छन्, जसमा ठाकुरलाई पहिलो वरीयताको अध्यक्ष मान्ने, कार्यकारिणी समिति पुनर्गठन गर्ने अधिकार दिने उल्लेख छ ।