कांग्रेस संसदीय दलको बैठक बस्दै, विश्वासको मत विफल पार्न सांसदहरुलाई निर्देशन दिने
काठमाडौं । प्रमुख प्रतिपक्षी दल नेपाली काँग्रेस संसदीय दलको बैठक आज बस्दैछ । आज दिउँसो २ बजे नयाँबानेश्वरस्थित संघीय संसद भवनमा बैठक बस्न लागेको हो ।
सोमबार प्रधानमन्त्रीले विश्वासको मत लिन बस्ने प्रतिनिधिसभाको बैठकका सन्दर्भमा रणनीति बनाउन बैठक बस्न लागेको हो । कांग्रेसले प्रधानमन्त्री ओलीलाई विश्वासको मत दिन नसक्ने यसअघि नै बताइसकेको छ । आजको संसदीय दलको बैठकले सोही निर्णयमाथि छलफल गरेर सांसदलाई सोही अनुसारको निर्देशन दिने बताइएको छ ।
बैठकमा पार्टी सभापति तथा दलका नेता शेरबहादुर देउवाले पछिल्लो राजनीतिक परिस्थितिबारे बिफ्रिङ गर्नेछन् । प्रधानमन्त्रीले विश्वासको मत लिन प्रतिनिधिसभाको बैठक बोलाएपछि कांग्रेस सभापति देउवा राजनीतिको केन्द्रमा देखिएका छन् ।
उनलाई भेट्न बुधबार प्रधानमन्त्री दलबलका साथ देउवा निवास पुगेका थिए । त्यसैगरी नेकपा एमालेका वरिष्ठ नेता माधव नेपाल, माओवादी केन्द्रका अध्यक्ष पुष्पकमल दाहाल प्रचण्ड र देउवाबीच दैनिकजसो भेटवार्ता भइरहेका छन् ।
