माओवादी केन्द्रसँगको एकता फापेनः शिक्षा मन्त्री
काठमाडौं । शिक्षा विज्ञान तथा प्रविधिमन्त्री कृष्ण गोपाल श्रेष्ठले नेकपा माओवादी केन्द्रसँगको एकता नफापेको बताएका छन् । नेपाल कम्युनिष्ट पार्टी (नेकपा) काठमाडौं क्षेत्र नम्बर ९ ले बिहीबार गरेको अगुवा कार्यकर्ता भेलालाई सम्बोधन गर्दै शिक्षामन्त्री श्रेष्ठले पार्टी एकताले आफ्ना राजनीतिक गतिविधिहरुलाई पेण्डुलम बनाएको बताए ।
उनले पार्टी एकताले पार्टीका राजनीतिक गतिविधि जाम भएको उल्लेख गर्दै अब भने राजनीतिक गतिविधिमाथि कसैले अंकुश लगाउन नसक्ने बताए । मन्त्री श्रेष्ठले प्रचण्ड माधव नेपालले सूर्य चिन्ह पाउने भएपनि भीम रावल र नारायणकाजी श्रेष्ठले सूर्य चिन्हमा चुनाव लडन नपाउने जिकिर गरे ।
मन्त्री श्रेष्ठले आफ्नो घरमा बसेका डेरावालले घरवेटीलाई निकाल्ने कुरा युक्तिसंगत नभएको भन्दै आफूहरुले कसैलाई पनि पार्टीबाट निष्काशन नगरि सदस्यहरु मात्रै विस्तार गरेको बताए ।