कर्णालीका मुख्यमन्त्री शाहीद्वारा प्रमुख सचेतक शाहलाई पदमुक्त

सुर्खेत । कर्णाली प्रदेशका नेकपाका संसदीय दलका नेता एवं मुख्यमन्त्री महेन्द्रबहादुर शाहीले प्रमुख सचेतक गुलावजंग शाहलाई प्रमुख सचेतकबाट पदमुक्त गरेका छन् । दलका नेताको हैसियतले मुख्यमन्त्री शाहीले संसदीय दलको विधानको धारा ७ अनुसार शाहलाई पदमुक्त गरेको जनाएका छन् ।

कामकारबाही सन्तोषजनक नभएकाले जिम्मेवारीमुक्त गरिएको शाहलाई दिइएको पत्रमा उल्लेख छ । आइतबार १८ जना सांसदले संसदीय दलका नेताविरुद्ध अविश्वासको प्रस्ताव बुझाएपछि शाहले मंगलबार एक बजेको लागि बैठक बोलाएका थिए । अब यो प्रकरणले उक्त बैठक अन्योलमा परेको छ । उनको स्थानमा सचेतक सीता नेपालीलाई नियुक्त गरिएको छ ।