जिल्लामा पार्टी समायोजनको समय असोज २९ सम्म बढाउने राप्रपाको निर्णय
काठमाडौं । राप्रपाले अनसनरत डा. गोविन्द केसीको जीवन रक्षाको माग गरेको छ । अध्यक्षत्रय कमल थापा, पशुपतिशमशेर राणा र डा. प्रकाशचन्द्र लोहनीको बिहीबार बसेको बैठकले केसीको जीवन रक्षाको माग गरेको छ । बैठकले निर्वाचन आयोगमा राप्रपा दर्ता भएकोमा खुसी व्यक्त गर्दै आयोगलाई धन्यवाद दिने निर्णय गरेको छ ।
त्यस्तै बैठकले जिल्लामा पार्टी समायोजनको समय असोज २९ सम्म बढाउने, केन्द्रीय कार्य समिति विस्तार गर्ने निर्णय गरेको अध्यक्ष थापाले सामाजिक सञ्जाल ट्विट मार्फत जानकारी दिएका छन् ।
अध्यक्ष थापाले निर्वाचन आयोगबाट वैधानिकता प्राप्त गरेसँगै राप्रपा अब तिव्र गतिमा संगठन निर्माणमा लाग्ने समेत बताएका छन् । राष्ट्रियता, प्रजातन्त्र र उदारवादको चिन्तनमा आधारित ’सम्वद्र्धनवाद’को बैचारिक धरातलमा सबल र समृद्ध नेपाल निर्माण राप्रपाको लक्ष्य हुने अध्यक्ष थापाले जनाएका छन् । आगामी चुनावसम्ममा राप्रपालाई देशको अग्रणी शक्ति बनाउने दृढता समेत उनले व्यक्त गरेका छन् ।
